10 kuriozitete rreth Formula 1

Që nga fillimi i Kampionatit Botëror FIA Formula 1 në 1950, ky sport ka përparuar shumë për sa i përket shkencës, hulumtimit dhe teknologjisë. Ka pasur përmirësime të mëdha, që e kanë bërë këtë sport edhe më atraktiv në ditët e sotme.

Ka shumë kuriozitete interesante që duhet t’i dini rreth këtij sporti. Më poshtë ne kemi renditur 10 prej tyre.

1. Formula 1 i ka rrënjët në kampionatet evropiane të Grand Prix të viteve 1920-1930, megjithëse themelimi i Formula 1 moderne filloi në 1946 me standardizimin e rregullave të Fédération Internationale de l’Automobile (FIA), i cili u pasua nga World Championship of Drivers në vitin 1950.

2. Në makinën e Formula 1 ka 1.5 litra ujë të pijshëm, të lidhura me një tub në kaskën e pilotit, i cili në shumicën e rasteve nuk mjafton për t’i mbajtur shoferët të hidratuar. Arsyeja kryesore e dehidratimit të pilotëve janë nivelet e larta të temperaturës në kabinën e makinës, të cilat arrijnë deri në 50 gradë Celsius.

3. Në kohët e sotme, gjatësia e pistave të garave në Formula 1 është afërsisht 4 deri 6 km. Nërsa, në vitin 1957 në Pescara të Italisë, ishte 25,578 km. e gjatë.

4. Pista e Formula 1 më e shkurtër është ajo e Monaco Grand Prix, e cila është e gjatë vetëm 3,337 km. dhe ka numrin më të madh të xhirove në pistë, saktësisht 78 të tilla.

5. Ashtu si në çdo sport tjetër, edhe pilotët e Formula 1 i nënshtrohen testeve të drogës.

6. Kampioni i Botës në Formula 1 me më shumë tituj të fituar, është Michael Schumacher me 7 të tillë, i cili ndiqet nga Lewis Hamilton me 6 të tillë.

7. Piloti i parë që fitoi Kampionatin Botëror të Formula 1 në vitin 1950 ishte piloti italian Giuseppe Farina me makinën Alfa Romeo.

8. Timoni i makinës së Formula 1 ka mbi 20 butona. Secili prej këtyre butonave ka funksione të ndryshme për ta bërë garën të mundur dhe efektive.

9. Një skuadër është e përbërë nga më shumë se 600 njerëz. Shumica e këtyre njerëzve punojnë prapa skenave, për të bërë të mundur gjithçka që ndodh në pistë.

10. Pothuajse të gjitha gomat e makinave të Formula 1 janë të mbushura me azot, pasi azoti ka presion më të qëndrueshëm sesa ajri normal.