Connect with us

Kuriozitete Sportive

10 sportet më të çuditshme në botë

Shuplakat në fytyrë

Jeni kuriozë të dini se cilat janë 10 sportet më të çuditshme në botë?

Fillesat e sportit në historinë e njerëzimit janë shumë të hershme.

Burimet historike dëshmojnë se në Kinën e Lashtë, Egjiptin e Lashtë dhe Perandorinë Romake praktikoheshin një sërë lojërash sportive, si: mundja, gjimnastika, atletika, boksi, noti dhe lloje të ndryshme të sporteve me top.

Mundja e ka zanafillën qysh në vitet 3000 p.e.s., ndërsa Lojërat Olimpike, në vitin 760 p.e.s. 

Sporti më i popullarizuar në botë sot, futbolli, filloi në Kinë në shekullin e tretë p.e.s., por iu desh një mijëvjeçar që të arrinte në Evropë.

Pothuajse të gjithë kanë njohuri për sportet më të ndjekura në botë, por ekzistojnë disa sporte të pazakonta që do t’ju lënë pa fjalë. 

Këto janë 10 sportet më të çuditshme në botë.

1. Shuplakat në fytyrë

Shuplakat në fytyrë
Dmitry Kotov / Facebook

Shuplakat në fytyrë nuk janë ndonjë gjë e padëgjuar ndonjëherë, por kompeticioni me shuplaka në fytyrë, po. 

Ky sport e ka origjinën në Rusi, në vitin 2018, dhe sado komike të duket, tashmë ai është bërë një ndër sportet më të famshme në këtë shtet.

Disa mund ta quajnë thjesht një “SHOW“, por në të vërtetë ai është një sport real, i cili madje arbitrohet edhe nga një gjyqtar.

Rregullat e ndeshjes janë të thjeshta – dy kundërshtarë qëndrojnë ballë për ballë dhe godasin me shuplaka njëri-tjetrin sipas radhës.

Secili prej tyre ka pesë tentativa për të goditur me shuplaka kundërshtarin e tij. Pas kësaj, gjyqtari vendos se kush fiton, dhe më pas fituesi kalon në raundin tjetër. Në shumicën e rasteve kundërshtari dorëzohet ose pëson nokaut.

Kliko linkun për të parë videon!

2. Hekurosje ekstreme

Hekurosje ekstreme
Bota e çuditshme e hekurosjes ekstreme / theolballgame

Hekurosja ekstreme është një sport ekstrem, në të cilin njerëzit hekurosin rroba në pozicione dhe vende të ndryshme ekstreme.

Ky sport unik lindi në Angli, në vitin 1980, thjesht rastësisht. Ai nisi kur një burrë anglez, i frymëzuar nga vëllai i tij, filloi të hekuroste rrobat nëpër ambiente të ndryshme, si: aeroporte, kabina telefonike dhe maja malesh.

Në ditët e sotme, hekurosja ekstreme është përhapur gjerësisht në shumë shtete të botës.

Rregullat janë të thjeshta:

Tavolina e hekurosjes duhet të ketë këmbë dhe të jetë 1 metër e gjatë dhe 30 centimetra e gjerë. Rregulli tjetër është që: nuk lejohet të përdoret një hekur hekurosjeje i rremë, ai duhet të jetë i vërtetë. Gjithashtu, rroba që do të hekuroset duhet të ketë të paktën madhësinë e një peshqiri duarsh. Dhe së fundmi, kryerja e hekurosjes duhet të zhvillohet në ambiente të jashtme.

Kliko linkun për të parë videon!

3. Kërcim lepuri (Kaninhoppning)

Kërcim lepuri (Kaninhoppning)
Një lepur duke kërcyer në një kompeticion / wikipedia

Një ditë prej ditësh, në Suedi, në vitet 1970, disa suedezë kishin një ide: Nëse kuajt mund të kërcejnë në gara, pse jo edhe lepujt? Pas disa kohësh, u zhvilluan garat e para me lepuj, dhe në vitin 1987 u mbajt kampionati i parë kombëtar.

Federata Suedeze e Kërcimit me Lepuj (SKHRF) u formua shtatë vjet më vonë, dhe s’kaloi shumë kohë, Gjermania, Norvegjia, Finlanda dhe madje edhe Shtetet e Bashkuara të Amerikës kishin krijuar klubet e tyre. Në ditët e sotme, kërcimi i lepujve, ose kaninhoppning në suedisht, ka një nënkulturë të vetën.

Çdo lepur mund të marrë pjesë, por pesha ideale është 2 deri në 5 kilogramë. Rekordi botëror për kërcimin më të lartë është 99,5 centimetra, dhe qëndron që nga viti 1997.

Kliko linkun për të parë videon!

4. Mundja e gishtërinjve të këmbës

Mundja e gishtërinjve të këmbës
Fitoftë këmba më e mirë! Caravanum / flickr

Ky sport e ka origjinën në Angli, në vitin 1974, dhe nisi si një shaka midis 4 shokëve, të cilët ishin të dehur. Madje një nga themeluesit e tij u bë edhe kampioni i pare i këtij sporti.

Mundja e gishtërinjve të këmbës është e ngjashme me mundjen e krahut. Për të luajtur, lojtarët duhet të heqin këpucët dhe çorapet, meqë loja luhet me këmbë të zbathura. Dhe, për mirësjellje, ata heqin këpucët dhe çorapet e njëri-tjetrit. Më pas, mbërthejnë gishtërinjtë me njëri-tjetrin dhe i vendosin mbi një tavolinë të vogël, e cila ka një barrierë për secilin lojtar. Lojtari që arrin ta kalojë këmbën e tjetrit në anën e kundërshtarit dhe të prekë barrierën, fiton.

Sigurisht që mundja e gishtërinjve të këmbës bën pjesë në 10 sportet më të çuditshme në botë.

Kliko linkun për të parë videon!

5. Gara me bashkëshorten në shpinë

Gara me bashkëshorten në shpinë
Çifti finlandez fiton Kampionatin Botëror / nbcnews

Ky sport e ka zanafillën në vitin 1992, në Finlandë. 

Një garues mashkull mbart në shpinë gruan e tij dhe vrapon përmes dy pengesave në terren të thatë dhe në një të njomë. Femra duhet të peshojë të paktën 49 kilogram, ose asaj do t’i shtohet peshë shtesë. Gara është saktësisht 253,5 m. e gjatë dhe skuadra që e përfundon atë më shpejt, fiton.

Shpërblimi për fituesin është modest, madje paksa qesharak ‒ aq sa peshon bashkëshortja, aq kilogram birrë përfiton.

Kliko linkun për të parë videon!

Lexo gjithashtu: 12 kuriozitete interesante rreth boksit

6. Hokeji nënujor

Hokeji nënujor
Një ekip hokeji nënujor duke u trajnuar. Wouss / Wikimedia

Hokeji nënujor është një sport nënujor, i cili është i ngjashëm me hokejin tradicional. Kjo lojë zakonisht luhet në një pishinë, ku lojtarët shtyjnë një disk hokeji mbi tabanin e pishinës. Ajo lindi në Angli, në vitin 1954, dhe quhet ndryshe Octopush.

Ekipet kanë nga 10 lojtarë secili, ku vetëm 6 prej tyre marrin pjesë në lojë. Loja përbëhet nga dy sete, zakonisht 10 deri në 15 minuta secili.

Shkopinjtë e hokejit janë të gjatë rreth 30 cm dhe disku i hokejit është më i rëndë se ai tradicional, rreth 1,3 kg, në mënyrë që të qëndrojë në tabanin e pishinës.

Kliko linkun për të parë videon!

7. Shkelmimi i kërcirit 

Shkelmimi i kërcirit
Konkurrentët në Kampionatin Botëror 2016. bigbeaverdiaries / Instagram

Shkelmimi i kërcirit është një sport luftarak anglez, ku garuesit shkelmojnë njëri-tjetrin në kërci (pjesa e këmbës nga gjuri deri tek kyçi i këmbës), derisa njëri të tërhiqet nga gara. 

Garuesit mbajnë jakën e njëri-tjetrit dhe përpiqen të godasin kërcirin e kundërshtarit të tyre me shkelm. Ata vendosin kashtë mbi sipërfaqen e kërcirit, sepse dhimbjet janë të padurueshme.

Turnetë e Shkelmimit të Kërcirit mund të tërheqin mijëra spektatorë. Kampionati botëror i këtij sporti mbahet në Lojërat Olimpike Cotswold në Gloucestershire, Angli. 

Ky “art marcial” ose sport i lashtë është mbi 400 vjeçar.

Kliko linkun për të parë videon!

8. Sërfi me qen

Sërfi me qen
Një qen duke bërë sërf në Maui. Frank Kovalchek / Wikimedia

Sërfi me qen filloi në Kaliforni, në vitet 1920, dhe është bërë një argëtim gjithnjë e më popullor për shumë njerëz anembanë botës. Qentë mund të bëjnë sërf vetëm ose me pronarët e tyre.

Me kalimin e viteve, disa qen sërfistë janë bërë shumë të famshëm, duke u shfaqur në filma, shfaqje televizive, revista dhe gazeta.

Në fakt, qentë u bënë aq të mirë në sërf, saqë njerëzit vendosën të zhvillojnë gara dhe të gjykojnë aftësitë e tyre bazuar në ekuilibër, lartësinë e dallgës dhe gjatësinë e rrëshqitjes. Në bazë të performancës, tre gjytarë vlerësojnë qenin fitues.

Kliko linkun për të parë videon!

9. Bossaball

Bossaball
Një ndeshje bossaball-i në plazhin e Marbellës, Spanjë / Wikimedia

Bossaball është një sport që e ka origjinën në Spanjë dhe është konceptuar nga Filip Eyckmans në vitin 2005. Bossaball është një lojë me top midis dy skuadrave, që ndërthur elemente të volejbollit, futbollit dhe gjimnastikës me muzikën. Ajo luhet mbi një “kamerdare të madhe” me një trampolinë në secilën anë të rrjetës. Trampolinat bëjnë që lojtarët të kërcejnë aq lart, sa të kapin topin mbi rrjetë dhe të shënojnë pikë në fushën e kundërshtarit.

Fjala “bossa” (e cila nganjëherë përkthehet si stil, dhunti ose qëndrim në gjuhën Portugeze Braziliane) lidhet zakonisht me Bossa Nova, një lloj muzike braziliane që rrjedh nga samba. Emri Bossaball, pra, shpreh qëllimin për të kombinuar sportin, muzikën dhe ngazëllimin.

Në ditët e sotme, bossaball luhet në mbi 20 shtete të botës.

Kliko linkun për të parë videon!

10. Volejboll me këmbë (Sepak Takraw)

Volejboll me këmbë (Sepak Takraw)
Një lojë sepak takraw në Universitetin Shtetëror të Visayas, Filipine. dbgg1979 / Wikimedia

Sepak Takraw është një lojë volejbolli me këmbë, ku lojtarët prekin, si dhe mbajnë topin duke përdorur vetëm këmbët, gjurin, gjoksin dhe kokën. 

Ky sport e ka zanafillën në Malajzi dhe është luajtur për herë të parë në shekullin e 15-të.

Rregullat e lojës janë shumë të ngjashme me atë të volejbollit. Ajo luhet duke përdorur një bastun prej palme kacavjerrëse ose një top sintetik. Dy skuadra lojtarësh përpiqen të kontrollojnë topin duke e prekur atë vetëm me këmbë, gjoks, gju ose kokë, dhe përpiqen ta godasin topin përtej rrjetës, në anën e kundërshtarit. Mosgoditja e topit pas rrjetës rezulton në një pikë për kundërshtarin dhe ekipi i parë që shënon pikët maksimale shpallet fitues.

Kliko linkun për të parë videon!

Blerimi është gjithashtu një nga kontribuesit tanë kryesorë, mbulon një gamë të gjërë artikujsh me një specialitet në departamentin e kurioziteteve sportive!

1 Comment

1 Comment

  1. Pingback: 12 sportet ekstreme më të rrezikshme në botë - Portali Sportiv

Leave a Reply

Your email address will not be published.

More in Kuriozitete Sportive