Formula 1

Arabia Saudite, plane për cirkuit të ri në Formula 1

by
Alteo C
January 18, 2020

Arabia Saudite po planifikon një pistë të re garimi që pritet të bëhet pjesë e Formula 1 në vitin 2023. Cirkuiti i Qiddiyah është pjesë e një kompleksi të ri sportesh dhe argëtimi, shumë afër kryqytetit Riyadh. Dizenjuesi i pistës është ish-piloti i Formula 1, Alexander Wurz.

Drejtori ekzekutiv Mike Reininger deklaroi për BBC Sport se pista do të jetë gati për të mirëpritur një “Grand Prix” në vitin 2023. Ai gjithashtu shtoi:

“Formalizimi i marrëveshjes është diçka që nuk na takon ne, prandaj nuk mund të flas për detajet. Ne po përqëndrohemi që të ndërtojmë një facilitet që të jetë në gjendje të mirëpresë evente të klasit botëror. Siç shpresojmë të ndodhë dhe në 2023-shin.”

Pista e Qiddiyah u prezantua në një simulator për publikun, gjatë një evenimenti ditën e premte. Ndër të ftuarit ishte dhe Damon Hill, kampioni i Formula 1 në vitin 1996, David Coulthard, Nico Hulkenberg dhe Loris Capirossi.

Alexander Wurz, 45 vjeçari që në karrierën e tij ka garuar për Benetton, McLaren dhe Williams është dizenjuesi i pistës si dhe konsulenti i projektit. Ai u shpreh për mediat:

“Është privilegji i një jete të tërë të dizenjoj pistën e garimit në Qiddiyah. Projekti na jep mundësi fantastike si dhe një arenë të jashtëzakonshme garimi, si për pilotët ashtu dhe për spektatorët.

Dizajni fantastik i cirkuitit vë në përdorim peisazhet natyrore dhe është menduar në mënyrë të tillë që të sfidojë pilotët por dhe inxhinierët e skuderive.”

Sipas disa raportimeve mendohet se “Grand prix” i Qiddiyah mund të zyrtarizohet në Formula 1 edhe përpara vitit 2023, por kjo mbetet për tu parë. Formula 1 e këtij sezoni mban rekordin për numrin e garave, plot 22, dhe vetëm “Grand prix” i Spanjës nuk ka ende një kontratë për të vazhduar në 2021-shin.

Related TopicsAlexander Wurz arabia saudite formula 1 Formula 1 Grand Prix

Alteo C

Alteo është një kontribues kryesor në "Portali Sportiv". Ka një eksperiencë disa vjeçare në fushën e gazetarisë sportive! Përcjell me pasion lajmin drejt audiencës tonë!

Click to comment