Connect with us

Futboll

Ronaldo-Higuain-Dybala dhe dilema e Sarri

sarri

Përse Sarri?

Trajneri i Juventus, Mauricio Sarri shihet si një prej idealistëve të futbollit të bukur. Disa vite më parë Napoli i tij merrte komplimentet e Pep Guardiola për lojën e bërë gjatë përballjeve në Champions League. Skuadra e tij nuk arriti të fitonte tituj, por cilesia e futbollit të luajtur ishte në nivelet më të larta në Serie A dhe jo vetëm.

Ndoshta ky do të ketë qenë edhe qëllimi i drejtuesve të Juventus me nënshkrimin e tij, dhënia e një dimensioni më sulmues një skuadre që vitet e fundit është identifikuar me mbrojtjen e hekurt dhe cinizmin në arritjen e rezultateve. Një strategji që ka funksionuar mirë gjatë kësaj dekade me fitimin e titullit të Serie A 8 herë rradhazi. Por me ardhjen e Cristiano Ronaldo dhe me objektivin Champions League ende jo të realizuar, ndoshta ishte koha për një drejtim të ri në lojën e bardhezinjve.

A ka ndryshuar Juventus?

Ndryshimi më i dukshëm në lojën e bardhezinjve është përpjekja për të pasur sa më shumë topin nën kontroll dhe ndërtimi i lojës me shumë pasime, gjë që më parë nuk ka qenë qëllim i lojës së tyre. Kjo është arritur deri diku pasi Juventus ka një mesatare të mbajtes së topit prej 56.6% dhe janë të dytët në Serie A për sa i përket kësaj statistike. Megjithatë qarkullimi i lojës nga Juventus nuk ka qenë plotësisht organik dhe shpeshherë është dukur i sforcuar ku shumica e pasimeve janë horizontale dhe skuadra nuk ka shfaqur lojën sulmuese që pritej.

Sarri ka këmbëngulur për skemën 4-3-1-2 me vetëm 2 prej Ronaldo, Higuain dhe Dybala në fushën e lojës. Por ndeshja me Udinese, ku këta futbollistë luajtën të tre në sulmin e skuadrës, ishte më e mira këtë sezon për sa i përket lojës dhe ndoshta mund ta shtyjë teknikun italian ti rimendojë zgjedhjet e tij.

Tredhëmbëshi i sulmit Ronaldo-Higuain-Dybala

Këtë sezon Dybala, Higuain dhe Ronaldo kanë luajtur të tre vetëm 178 minuta përgjatë 6 ndeshjeve dhe rezultati ka qenë 7 gola të shënuar prej tyre. Ronaldo ka shënuar 4, Dybala 2 dhe Higuain 1. Nëse bëjmë një mesatare të minutave që i duhet njërit prej tyre për të shënuar kur luajnë së bashku atëherë rezultati është i jashtëzakonshëm, 1 gol cdo 25.4 minuta.

A duhet të guxojë më shumë Sarri?

Askush nuk mund të pretendojë se mund të dijë më shumë rreth skuadrës se trajneri i saj. I pyetur për këtë cështje, Sarri ka paraqitur argumentin se skuadrës i duhet balancë dhe ekuilibër, të cilat humbasin disi kur të tre sulmuesit e mësipërm janë në fushë.

Ky argument është padyshim i vlefshëm. Megjithatë nëse Sarri do të arrinte të gjente formulën e duhur në formacionin e tij, ku skuadra të arrinte të performonte si duhej në fazën mbrojtëse edhe me një përfshirje të minimizuar të tre sulmuesve, ndoshta Juventus do të kalonte në një nivel tjetër.

Shifrat e mësipërme nuk janë rastësi. Ronaldo-Higuain-Dybala ka potencialin për tu shndërruar në një prej sulmeve më të frikshme në Europë dhe mund ta bëjnë Juventus të aftë për të fituar gjithcka.

Gjithesi mbetet në dorën e Sarri për të vendosur se cila është zgjidhja më e mirë për skuadrën e tij, por nëse ata vazhdojnë të performojnë në këtë mënyrë kur luajnë së bashku, do të jetë e vështirë për trajnerin të lërë jashtë formacionit njërin prej tyre. Ndoshta për të realizuar objektivin Champions League do të jetë e nevojshme të guxohet më shumë se zakonisht për të arritur suksesin.

Lajdan është një nga kontribuesit kryesorë të "Portali Sportiv", me një pasion për gazetarinë sportive ai ka treguar gjithmonë një nivel të lartë profesional në përcjelljen e lajmit tek audienca jonë!

2 Comments

2 Comments

  1. Pingback: Cristiano Ronaldo mund ta mbyllë karrierën tek Juventus - Portali Sportiv

  2. Pingback: Ronaldo sfidon ligjet e gravitetit - Portali Sportiv

Leave a Reply

Your email address will not be published.

More in Futboll