Serie A, Lazio mposht Inter dhe konfirmohet si pretendente

Gara për titullin e Serie A ka vazhduar edhe këtë fundjavë. Pas fitores së Juventus ndaj Brescia, sytë e të gjithëve ishin nga kryendeshja e kësaj jave, përballja mes Inter dhe Lazio. 

Të dyja skuadrat vinin me të njëjtin qëllim, fitoren, për të mbajtur ritmin e kampionëve në fuqi të Juventus. Ndërkohë që lojtarët zbrisnin në fushë, dukej qartë se morali ishte i lartë tek të dyja skuadrat.

Pjesa e parë u karakterizua nga një lojë e balancuar me të dyja ekipet që patën disa raste shënimi, por zhbllokimi i rezultatit do të vinte vetëm në minutat e fundit.

Candreva bën një goditje në hyrje të zonës e cila largohet nga Strakosha, por topi i kthyer gjen Young në vendin e duhur, në kohën e duhur. Goditja e anglezit është në kuadrat dhe kësaj here portieri shqiptar i Lazio e ka të pamundur ta arrijë. Inter e mbyll kështu pjesën e parë në avantzhin e një goli.

Menjëherë pas pushimit, Lazio duket e vendosur për të reaguar. Në minutën e 50-të gjyqtari akordon një penallti në favor të të kaltërve e cila ekzekutohet saktë nga Immobile. Ky ishte goli i 26 në Serie A për italianin që momentalisht kryeson garën e golashënuesve në kampionat, por edhe atë për Këpucën e Artë Europiane.

Loja vazhdon e shpejtë dhe me ritëm, me të dyja skuadrat që nuk kënaqen me barazimin. Kësaj here është rradha e Lazio për tëkaluar në avantazh. Goli erdhi në minutën e 69-të me autor Milinkovic-Savic. Lazio përmbys rezultatin dhe Stadio Olimpico është në delir.

Konte përpiqet të ndryshojë gjërat në fushë duke kryer 3 zëvendësime në vazhdim. Candreva, Brozovic dhe Godin ja lanë vendin respektivisht Moses, Eriksen dhe Sanchez.

Rastin më të mirë për të barazuar e pati Lukaku, por goditja e sulmuesit brenda zonës arriti të bllokohej nga mbrojtësit e Lazio. Rezultati nuk ndryshoi as në minutat e mbetura. 

Lazio përmbysi disavantazhin dhe arriti të fitojë takimin me rezultatin 2-1. Këto 3 pikë i cojnë kryeqytetasit në vend të dytë, vetëm një pikë pas kryesuesve të Juventus, ndërsa Inter zbret në vend të tretë 3 pikë larg kreut.

Pak mund ta mendonin në fillim të sezonit se në këtë pikë Lazio do të ishte kaq pranë kreut të Serie A. Skuadra e Simone Inzaghi e ka merituar plotësisht suksesin e deritanishëm pasi ecuria e tyre ka qenë e jashtëzakonshme.

Me fitoren ndaj Inter, Lazio arrin në shifrën e 19 ndeshjeve rradhazi pa humje në Serie A. Tashmë ata janë padyshim një prej pretendentëve në garën për titullin kampion.