Raiola: Pogba nuk do të ishte kundër rikthimit tek Juventus

Agjenti i Paul Pogba, Mino Raiola, ka deklaruar së fundmi se klienti i tij nuk do ta kundërshtonte një transferim tek ish-skuadra e tij Juventus në përfundim të këtij sezoni.

Francezi kaloi nga Juventus tek Manchester United në verën e vitit 2016 për një shifer rekord, por aventura e tij tek Red Devils është karakterizuar nga lëkundje të shpeshta të formës.

Shumë fansa të United mendojnë se Pogba nuk ka arritur ta persërisë formën e treguar në Serie A dhe si rrjedhim nuk e ka justifikuar investimin e madh që klubi ka bërë tek ai.

Prej kohësh kanë qarkulluar zëra për nje largim të mundshëm të Pogba. Real Madrid është përfolur shpesh si një destinacion i mundshëm , me trajnerin Zidane që e pëlqen së tepërmi lojtarin. 

Megjithatë së fundmi është shfaqur edhe ideja e një rikthimi tek Juventus, skuadër me të cilën Pogba arriti të njihej si një prej talenteve më të mëdha të futbollit europian.

Agjenti i lojtarit, Mino Raiola, i ka nxitur edhe më shumë zërat e merkatos me një deklaratë të ditëve të fundit:

“Italia është si një shtëpi e dytë për Pogba. Ai nuk dò të ishte kundër idesë per tu rikthyer tek Juventus, por do të shohim cdo të ndodhë pas Euro 2020.”

Pavarësisht spekulimeve mbi të ardhmen e tij, fokusi kryesor i Pogba aktualisht mbetet rikthimi në fushë pas periudhës së dëmtimit.

Rikthimi i tij në fushën e lojës pritet të ndodhë muajin e ardhshëm dhe padyshim prezenca e një lojtari me kualitetin e tij do të jetë një ndihmë e madhe për Manchester United në perpjekjen e tyre për tu kualifikuar në Champions League.