Odion Ighalo i bashkohet Manchester United

Manchester United ka bërë goditjen e fundit për këtë merkato janari. Pas transferimit të Bruno Fernandes në “Old Trafford”, klubi anglez ka zyrtarizuar dhe transferimin e ish-sulmuesit të Watford, Odion Ighalo.

Manchester United ka bërë me dije se sulmuesi është tashmë pjesë e klubit në formën e huazimit deri në fund të sezonit. Nga detajet mësohet se marrëveshja mes anglezëve dhe Shanghai Shenhua, që zotëron kartonin e lojtarit nuk ka një opsion blerjeje në fund të sezonit.

Mbi transferimin ka folur dhe trajneri i “Djajëve të Kuq”, Ole Solskjaer:

“Odion është një lojtar me mjaft eksperiencë. Ai do të na japë mundësinë për të eksperimentuar me një tjetër lloj qendër-sulmuesi , për kohën e shkurtër që do të jetë me ne. Është një djalë mjaft i talentuar dhe shumë profesionist, dhe jam i bindur se do të bëjë më të mirën këtu.”

Ighalo u transferua në Superligën kineze në vitin 2017, fillimisht me skuadrën e Changchun Yatai. Më pas futbollisti u transferua te Shanghai Shenhua dhe shënoi 10 gola në 19 ndeshje për klubin.

Forma e futbollistit me përfaqësuesen nigeriane ka qënë akoma dhe më mbresëlënëse. Odion Ighalo e mbylli fazën kualifikuese afrikane për Ligën e Kombeve si golashënuesi më i mirë. Gjithashtu shënoi dhe 5 gola gjatë kompeticionit në verë.

Për kartonin e Ighalo kishte dhe klube të tjera të interesuara nga Premier League, por sulmuesi zgjodhi të lunate për Manchester United. 

Ndërkohë klubi anglez ka pranuar se huazimi i Odion Ighalo bie ndesh me politikat e klubit, që po përpiqet të nënshkruajë me lojtarë në planin afatgjatë.

Gjithsesi dëmtimi i Marcus Rashford në repartin ofensiv la një hendek të madh te United. Pa transferimin e një sulmuesi, djemtë e Ole Solskjaer do ta kishin mjaft të vështirë të mbyllnin sezonin.

Mbetet të shikojmë se çfarë do të sjellë të re Odion Ighalo në “Old Trafford”.