Maguire do të jetë kapiteni i ri i Manchester United, Ashley Young drejt Inter

Tashmë që largimi i Ashley Young tek Inter është thuajse i kryer, tek United duket se nuk kanë vonuar për të zgjedhur kapitenin e ri.

Harry Maguire u bë mbrojtësi më i shtrenjtë në histori kur u transferua tek Djajtë e Kuq, dhe tashmë duket se klubi po i beson atij shiritin që është mbajtur më parë nga legjenda si Keane, Giggs dhe Rooney.

Këtë gjë e ka konfirmuar trajneri i Manchester United, Solskjaer, i cili u shpreh:

“Harry e ka mbajtur shiritin prej disa ndeshjesh dhe do të vazhdojë ta bëjë këtë gjë.”

“Ai është treguar një lider. Kjo gjë nuk më ka surprizuar, por gjithsesi jam i impresionuar nga aftësitë e tij të lidershipit, prandaj ai do të vazhdojë të jetë kapiten.”

Për sa i përket largimit të Ashley Young, Solskjaer tha:

“Ashley do të jetë 35 vjec në verë, dhe nëse diku tjetër i ofrojnë një kontratë 2-vjecare, është e kuptueshme që të pranojë.”

“Ai i ka shërbyer mirë klubit, si lojtar dhe kapiten.”

E vërteta është se në vitet e fundit Manchester United ka kaluar një periudhë të vështirë. Shumë lojtarë janë vënë në qendër të kritikave, mes tyre edhe Ashley Young, i cili për shumë fansa të United, nuk kishte cilësitë e duhura për të qenë kapiten i klubit. 

Nga ana tjetër Maguire mund të pranohet më shpejt si lideri i ri. Një blerje rekord e klubit, titullar i kombëtares angleze, qendërmbrojtësi gëzon simpatinë e tifozëve. 

Edhe pse ai ka ende shumë për të treguar, vendimi për ti dhënë shiritin e kapitenit duket i drejtë, sepse  një skuadër e mbushur me lojtarë të rinj si Manchester United i këtij sezoni ka nevojë për një lider me eksperiencë.