Futboll

Kieran Trippier: Diego Simeone trajneri më i mirë në botë

by
Alteo C
January 29, 2020

Janë bërë tashmë më shumë se 6 muaj që kur mbojtësi anglez Kieran Trippier la skuadrën e Tottenham për t’iu bashkuar spanjollëve të Atletico Madrid. Dhe që prej asaj kohe lojtari nuk e ka kthyer kokën pas.

Në një intervistë për BBC Radio 5, Trippier tha se po jeton ditë mjaft të bukura në Madrid. Futbollisti i përfaqësueses angleze u shpreh mjaft i lumtur për transferimin në Spanjë:

“Po kaloj një periudhë fantastike. Bashkëshortja ime dhe dy fëmijët e mi janë gjëja më e rëndësishme për mua, dhe ata janë mjaft të lumtur këtu. Kjo ma bën punën shumë më të lehtë. Gjithashtu jam përmirësuar në spanjisht, kuptoj shumë më shumë nga ç’mund të flas por po përmirësohem, kjo ka rëndësi.”

Kieran Trippier foli dhe për mjedisin tek Atletico Madrid dhe lojtarët:

“Që ditën e parë kur mbërrita këtu pashë sa mikpritës ishin të gjithë. Lojtarët, stafi, të gjithë janë kaq të lidhur me njëri-tjetrin dhe kjo është një gjë shumë e rëndësishme për mua.

Edhe punonjësit e sigurisë të përqafojnë kur hyn në trajnim. Kjo gjë nuk ndodh shumë herë në Angli. Dhe lojtarët që nuk aktivizohen ,nuk shfaqin zhgënjim ose inat. Jemi të gjithë një familje e madhe.”

I pyetur mbi trajnerin Simeone, Kieran Trippier nuk i kurseu fjalët e mira. Anglezi tha për BBC Radio 5 se nën drejtimin e argjentinasit ai po evolon në një lojtar më të mirë:

“Të gjithë e dine se sa i aftë dhe pasionant është Simeone në punën që bën. Është i jashtëzakonshëm dhe jam me fat që po mësoj prej tij. Ende kemi pak vështirësi në komunikim, por në fushë ky nuk është një problem pasi e di se çfarë kërkon ai nga ne.

A është Simeone trajneri më i mirë në botë ? Për mua po. Vetëm kur luan për të e kupton realisht se sa trajner i mirë është. Atletico Madrid është me fat.”

Alteo C

Alteo është një kontribues kryesor në "Portali Sportiv". Ka një eksperiencë disa vjeçare në fushën e gazetarisë sportive! Përcjell me pasion lajmin drejt audiencës tonë!

Click to comment