Sipas raportimeve më të fundit të Tuttosport, trajneri i Juventus, Massimiliano Allegri, ka identifikuar sulmin dhe mesfushën si dy repartet më të rëndësishme, që kanë nevojë për përmirësime merkaton e ardhshme. Për këtë arsye, “Zonja e Vjetër” ka bërë gati një listë lojtarësh që shihen si të përshtatshëm për t’u bërë pjesë e ekipit.
Lojtari që ka tërhequr më shumë interesin e italianëve, është Aurelien Tchouameni i Monaco. Mesfushori francez ka ngjallur gjithashtu interesin e klubeve të tjera “big” në Europë si: Chelsea, Liverpool, Manchester City, Manchester United dhe Real Madrid. Sipas burimeve zyrtare të ESPN, agjentë sportive të shumë skuadrave kanë ndjekur “live” paraqitjet e lojtarit, i cili konsiderohet një nga talentet e reja më me prespektivë në futbollin botëror.
Monaco nga ana e vet pritet të kërkojë minimalisht 50-60 milionë euro për shërbimet e Aurelien Tchouameni. Përveç Juventus, anglezët e Manchester United janë gjithashtu mjaft të interesuar për kartonin e francezit. Kjo pasi ekziston mundësia që Paul Pogba të largohet nga klubi, duke lënë një boshllëk mjaft të madh në mesfushën e “Djajëve të Kuq”.
Ndërkohë e ardhmja e Pogba duket gjithnjë e më e paqartë te United. Kontrata e mesfushorit skadon në fund të sezonit, dhe agjenti i tij, Mino Raiola, është hedhur në kërkim të klubit të ardhshëm ku Pogba mund të aktivizohet. Së fundmi, është Barcelona që është hedhur në lojë për të përfituar shërbimet e shtatëlartit të United. Një transferim me kosto zero do të ishte perfekt për Barcelonën, e cila ndodhet në një situatë tejet të vështirë financiare. Por pavarësisht interesit nga klube të ndryshme, të gjitha pritet të hasin në kundërshtinë e Ole Solskjaer, i cili nuk dëshiron kurrsesi të humbasë një nga lojtarët e tij më të rëndësishëm.
Ndërkohë Juventus ka gati planin rezervë, në rast se transferimi i Tchouameni nuk është i mundur. Italianët i kanë sytë dhe tek Axel Witsel i Dortmund, si dhe Desnis Zakaria i Borussia Monchengladbach, Kontrata e të dy futbollistëve me klubet respektive skadon në verën e ardhshme. Një tjetër alternativë mjaft e përshtatshme është dhe talenti i Ajax, Ryan Gravenberch.
Përsa i përket sulmit, Juventus pritet të presë merkaton verore për të bërë një lëvizje. Drejtuesit e klubit dëshirojnë të sjellin në Torino talentin e Fiorentinës, Dusan Vlahovic, Por, konkurrenca për këtë të fundit pritet të jetë e fortë nga rivalët e tjerë europianë. Planet e italianëve mund të prishen shumë lehtë, duke marrë parasysh se një klub tjetër mund të afrojë mesfushorin që në merkaton e janarit.
Për këtë arsye, juventinët kanë një plan rezervë dhe për sulmin. Dhe ky plan lidhet me një emër të njohur tashmë për tifozët e klubit, Alvaro Morata. Spanjolli luan momentalisht si i huazuar me Juventus, dhe kartoni i tij zotërohet nga Atletico Madrid. Në rast se Allegri dështon me transferimin e Vlahovic, ai do të kërkojë nga klubi blerjen përfundimtare të kartonit të Moratës. Në këtë mënyrë Juventus krijon më shumë siguri në repartin ofensiv.
