Pirlo konfirmon dëmtimin e Ronaldo

Ylli portugez i Juventus, Cristiano Ronaldo, u detyrua të largohej nga fusha në 15 minutat e fundit të ndeshjes që bardhezinjtë luajtën ndaj Lazio këtë të dielë.

Portugezi kishte shënuar më parë golin e avantazhit për Juventus, por skuadra e Pirlo nuk arriti ta ruante avantazhin dhe rezultati u barazua nga Caicedo në minutën e 95-të.

Ronaldo u zëvendësua në minutën e 76-të me Dybala që zuri vendin e tij. Portugezi mori një goditje në një përplasje me Luiz Alberto dhe duket se Pirlo nuk ka dashur të rrezikojë. I pyetur në fund të ndeshjes në lidhje me dëmtimin e Ronaldo trajneri i Juventus nuk dha detaje se sa i rëndë ishte ky dëmtim.

“Ronaldo është një lojtar deciziv jo vetëm për ne, por për cdo ekip për të cilin ka luajtur. Fatkeqësisht ai pati një problem në kycin e këmbës dhe ju desh të largohej nga fusha.”

Ndërsa në lidhje me performancën e skuadrës, Pirlo u shpreh:

“Ne luajtëm mirë, ata thuajse nuk goditën në portë, por duhet të kemi më shumë kujdes tek detajet. Nuk e manaxhuam topin si duhet në 10 sekondat e fundit. Jemi të kënaqur me lojën , por fatkeqësisht jo me rezultatin.”

Me këtë rezultat Juventus shkon në kuotën e 13 pikëve me 3 fitore dhe 4 barazime në 7 ndeshjet e luajtura deri tani. Barazimi në fushën e Lazio nuk mund të quhet një rezultat negativ.

Pjesa tjetër e pikëve të lëna, sidomos në mungesë të Ronaldo, e kanë vënë në pikëpyetje aftësinë e skuadrës së Pirlo për të diskutuar edhe njëhërë tjetër titullin e Serie A. Duke pasur parasysh këtë gjë, të gjithë në kampin bardhezi do të jenë duke shpresuar se dëmtimi i portugezit nuk do të jetë serioz.