Sulmuesi 15-vjeçar JJ Gabriel ka kërkuar zyrtarisht anulimin e menjëhershëm të regjistrimit të tij te Manchester United dhe është pranë largimit nga klubi. United mund ta kundërshtojë kërkesën dhe drejtuesit ende po përpiqen të gjejnë një zgjidhje me familjen e lojtarit.
Gabriel është i regjistruar te United deri në fund të sezonit. Drejtori ekzekutiv Omar Berrada dhe drejtori i futbollit Jason Wilcox janë përfshirë drejtpërdrejt në bisedime. Marrëdhëniet mes familjes dhe klubit janë përkeqësuar, por arsyet e sakta të mosmarrëveshjes nuk janë bërë publike.
Kjo situatë ka ndryshuar edhe planet për përfshirjen e tij në ekipin e parë. Gabriel pritej të debutonte në një ndeshje zyrtare kundër Brightonit në Carabao Cup, por ky plan është anuluar. Ai kishte munguar në stërvitjet me skuadrën e Michael Carrickut në fund të javës së kaluar.
Paraqitja e tij e vetme me ekipin e parë gjatë përgatitjeve verore ishte më 1 gusht 2026, në miqësoren kundër Atletico Madridit në Stokholm. Gabriel luajti tetë minuta, ndonëse ishte përfshirë në listën e lojtarëve për katër nga pesë ndeshjet pas udhëtimit fillestar të skuadrës në Helsinki.
Në nivelin e të rinjve, ai kishte fituar çmimin e lojtarit të sezonit në Premier League U18 dhe ishte shpallur lojtari i sezonit në ekipin U18 të United. Kishte ndihmuar gjithashtu skuadrën të arrinte në finalet e FA Youth Cup dhe Premier League U18. Këtë sezon kaloi në skuadrën që garon në Premier League 2 dhe shënoi tre gola në debutimin në UEFA Youth League.
Berrada dhe Wilcox kishin ndërhyrë edhe në verën e vitit 2025 për ta bindur të qëndronte. Atëherë iu paraqit një rrugë drejt ekipit të parë, duke nisur me pjesëmarrjen në stërvitje nën drejtimin e Ruben Amorimit e më pas të Carrickut.
Ndërkohë, Manchester Evening News raporton se Barcelona ka bërë ofertë për Gabrielin. Një kalim i mundshëm mbetet i lidhur me anulimin e regjistrimit të tij te United. Sulmuesi mbush 16 vjeç më 6 tetor, kur do të mund të nënshkruajë një marrëveshje burse sportive me klubin. /BBC
Raporto një pasaktësi
