Trajneri i Bayern Munichut, Vincent Kompany, doli nga spitali të mërkurën, pas kolapsit që pësoi në qendrën stërvitore të klubit. Anëtari i bordit përgjegjës për sportin, Max Eberl, tha se belgu ishte në gjendje të mirë duke marrë parasysh rrethanat dhe se do ta vazhdonte rikuperimin në shtëpi.
Kompany, 40 vjeç, ishte dërguar urgjentisht në spital të premten e kaluar, pasi u ndie keq dhe u rrëzua teksa ndiqte stërvitjen e ekipit të dytë të Bayernit. Eberl shpjegoi se shkaku i incidentit ishte identifikuar si irritim i meningjeve, membranave që mbështjellin trurin dhe palcën kurrizore.
Në ditët para incidentit, trajneri kishte pasur probleme me një virus dhe kishte munguar në disa seanca stërvitore. Ai nuk mori pjesë as në konferencën për shtyp para takimit të Ligës së Kampionëve kundër Arsenalit, por më pas ishte në stol për ndeshjen e së mërkurës së kaluar.
Duke folur për ARD-në para përballjes së Kupës së Gjermanisë me Magdeburgun, Eberl tha se Kompany tani kishte nevojë për pushim dhe trajtim me barna. Ai shtoi se, sipas mjekëve, virusi i mëparshëm nuk kishte qenë shkaktari i këtij episodi.
Dalja nga spitali nuk solli një afat të ri për kthimin në punë. Bayerni kishte njoftuar të shtunën se mungesa do të zgjaste javë, jo ditë. Eberl theksoi se trajnerit do t’i jepej koha e nevojshme dhe se rikthimi do të bëhej me miratimin e mjekëve.
Në mungesë të tij, drejtimin e skuadrës e ka marrë ndihmëstrajneri anglez Aaron Danks. Ai udhëhoqi Bayernin në fitoren 3:1 në fushën e Freiburgut të dielën.
Bayerni, që kryeson Bundesligën, ka në program të shtunën përballjen me rivalin për titull, Borussia Dortmundin. /BBC
Raporto një pasaktësi