Inter Miami fitoi Campeones Cup 2026 pasi mposhti Cruz Azulin 2:0 në shtëpi, mbrëmjen e 16 shtatorit. Lionel Messi e hapi rezultatin me golin e tij të 100-të për klubin amerikan dhe më pas asistoi për Casemiron, i cili shënoi golin e dytë të finales.
Epërsia erdhi në minutën e 24-të, pas një krosimi të Luis Suarezit. Messi u shkëput nga mbrojtja, fitoi duelin me Willer Dittën dhe e dërgoi topin në rrjetë me kokë. Argjentinasi arriti shifrën e 100 golave në 115 paraqitje me Inter Miamin në të gjitha garat.
Cruz Azul kërkoi barazimin dhe krijoi raste pas golit të pësuar, por nuk arriti t’i shfrytëzonte. Skuadra nga Florida e ruajti avantazhin deri në pjesën e fundit të takimit, kur një tjetër goditje me kokë e përcaktoi rezultatin përfundimtar.
Në minutën e 81-të, Messi ekzekutoi kornerin nga i cili shënoi Casemiro. Për mesfushorin brazilian ishte goli i katërt në pesë ndeshjet e fundit; të katër i kishte realizuar me kokë.
Jubileu i Messit erdhi ndaj të njëjtit kundërshtar të cilit i kishte shënuar golin e parë me Inter Miamin. Në debutimin e tij, në korrik të vitit 2023, ai realizoi nga goditja e lirë në minutat shtesë dhe i dha skuadrës fitoren 2:1 ndaj Cruz Azulit në Kupën e Ligës.
Campeones Cup iu shtua tre trofeve që Inter Miami kishte fituar pas ardhjes së Messit: Kupës së Ligës më 2023, Supporters’ Shield më 2024 dhe MLS Cup më 2025. Sipas numërimit të Marcës, ky sukses e çoi argjentinasin në 48 trofe gjatë karrierës me klube dhe përfaqësueset e Argjentinës.
Pas finales, Inter Miami kishte në program rikthimin në MLS me ndeshjen në shtëpi ndaj San Diegos, të dielën në stadiumin “Nu Stadium”. Skuadra nga Florida e priste këtë përballje nga vendi i dytë në Konferencën Lindore. /MARCA
Raporto një pasaktësi
