Federata izraelite reagon ndaj Hallgrimssonit mes thirrjeve për bojkot në Irlandë

Federata e Futbollit e Izraelit ka reaguar ashpër ndaj përzgjedhësit të Irlandës, Heimir Hallgrimsson, pas komenteve të tij për përballjet mes dy përfaqësueseve në Ligën e Kombeve. Në një reagim publik në rrjetin social X, federata e akuzoi trajnerin islandez për injorancë, hipokrizi dhe marrëzi, ndërsa në Irlandë vazhdojnë kërkesat për bojkotimin e ndeshjeve.

Hallgrimsson i kishte bërë komentet gjatë prezantimit të listës së lojtarëve, kur u pyet se si do ta mbante skuadrën të përqendruar te futbolli përballë thirrjeve për bojkot për shkak të situatës në Gaza. Ai e paraqiti pjesëmarrjen në këto takime si përballje kundër Izraelit dhe kundër asaj që e cilësoi si gjenocid, jo si bashkëpunim me të.

Në kundërpërgjigjen e saj, federata izraelite përmendi kontributet e Izraelit në fusha të ndryshme dhe çmimet Nobel, përpara se ta sulmonte personalisht Hallgrimssonin. Ajo e përdori formulimin e trajnerit për të deklaruar se do të përballej me një përzgjedhës që, sipas saj, mishëronte cilësitë për të cilat e akuzonte.

Kundërshtimi ndaj zhvillimit të ndeshjeve është shprehur edhe jashtë fushës. Të hënën në mbrëmje u mbajt një protestë para hotelit ku qëndronin futbollistët e Irlandës. Më shumë se 160 sportistë irlandezë kanë nënshkruar ndërkohë një letër të hapur të organizatës “Sporti irlandez për Palestinën”, me kërkesën për bojkot.

Nënshkruesit u kanë kërkuar futbollistëve të veprojnë sipas ndërgjegjes së tyre dhe të refuzojnë pjesëmarrjen. Në letër kritikohet edhe mosndërhyrja më herët e federatës irlandeze, UEFA-s dhe qeverisë së Irlandës. Megjithatë, federata irlandeze kishte votuar në një asamble të jashtëzakonshme në korrik që takimet të zhvilloheshin.

Hallgrimsson ka treguar se ka biseduar individualisht me lojtarët për përballjet me Izraelin dhe ka pranuar shqetësimin brenda skuadrës. Sipas tij, pjesëmarrja e futbollistëve në grumbullim dëshmon unitetin e grupit në rrethana të vështira.

Irlanda fillimisht përballet me Kosovën të enjten. Më pas, Izraeli do ta presë në Debrecen të Hungarisë më 27 shtator, ndërsa takimi ku Irlanda është pritëse do të zhvillohet më 4 tetor në Baçka Topolë të Serbisë. Kjo ndeshje do të luhet pa shikues, si masë për të shmangur incidente të mundshme. /KOHA