Franca e mundi Belgjikën 1:0 në Bruksel më 28 shtator 2026, duke regjistruar fitoren e dytë në Grupin 1 të Ligës A të Ligës së Kombeve. Michael Olise shënoi golin vendimtar në fund, ndërsa takimi solli edhe debutimin e tre futbollistëve me përfaqësuesen franceze.
Në pjesën e parë, Desiré Doue ishte ndër lojtarët që e rrezikuan më shumë portën belge. Ai goditi traversën në minutën e 12-të dhe më pas provoi sërish me një goditje të rrezikshme, por portieri Senne Lammens ndërhyri për të mos lejuar golin.
Franca vazhdoi të kërkonte epërsinë edhe pas pushimit, me Doue që krijoi sërish rrezik. Belgjika pati mundësinë e saj përmes Dodi Lukebakios në minutën e 73-të, por Mike Maignan e ndali goditjen dhe e mbajti portën të paprekur.
Zgjidhja për francezët erdhi nga Olise, i cili ishte futur në fushë në minutën e 77-të. Futbollisti i Bayernit kaloi kundërshtarët dhe shënoi me këmbën e majtë në minutën e 88-të. Franca e ruajti epërsinë deri në përfundim të takimit.
Në këtë ndeshje të xhiros së dytë, Jeremy Jacquet, Andy Diouf dhe Lucas Da Cunha regjistruan paraqitjet e para me Francën. Kështu, suksesi në transfertë u shoqërua me përfshirjen e tre emrave të rinj në përfaqësuese.
Sipas statistikave të Stats du Foot, Franca nuk kishte pasur tre debutues në të njëjtën ndeshje që nga 22 shtatori 2022. Në atë takim kundër Austrisë kishin debutuar Benoit Badiashile, Youssouf Fofana dhe Randal Kolo Muani.
Pas fitores ndaj Turqisë në ndeshjen e parë, Franca arriti në gjashtë pikë dhe kryesoi grupin. Belgjika dhe Italia kishin nga tri pikë, ndërsa Turqia mbeti e fundit pa pikë pas humbjes ndaj italianëve. /TELEGRAFI
Raporto një pasaktësi