Shqipëria do të përfaqësohet për herë të dytë në Unity EURO Cup, turneun e organizuar nga UEFA dhe Agjencia e OKB-së për Refugjatët (UNHCR). Aktiviteti do të zhvillohet më 14–16 tetor 2026 në Coverciano të Italisë, ndërsa ekipi shqiptar do të ketë përballë Austrinë, Letoninë dhe Rumaninë në fazën e parë.
FSHF ka njoftuar se në ekip do të përfshihen vajza dhe djem refugjatë që jetojnë në Shqipëri. Federata do të mbështesë pjesëmarrjen e tyre në këtë aktivitet, i cili ndërthur garën sportive me përfshirjen në jetën komunitare dhe krijimin e mundësive të barabarta.
Turneu do të zhvillohet në qendrën teknike të Federatës Italiane të Futbollit, në periferi të Firences. Me 22 ekipe pjesëmarrëse, edicioni i vitit 2026 do të jetë më i madhi që prej nisjes së kësaj nisme në vitin 2022, kur morën pjesë tetë ekipe.
Unity EURO Cup luhet me nga shtatë lojtarë në fushë dhe me ekipe të përziera gjinore. Sipas rregullave të publikuara nga UEFA, çdo skuadër përbëhet nga shtatë lojtarë refugjatë dhe katër nga komunitetet pritëse, ndërsa në përbërje duhet të ketë të paktën tri gra.
Pas fazës fillestare, gara do të vazhdojë me eliminim të drejtpërdrejtë. Katër ekipet e para do të kualifikohen drejtpërdrejt në çerekfinale, kurse skuadrat që renditen nga vendi i pestë deri në të dymbëdhjetin do të luajnë për katër vendet e tjera.
Shqipëria ishte pjesë edhe e edicionit të vitit 2025, të zhvilluar në Zeist të Holandës me 18 ekipe. Trofeun e fitoi Finlanda, e cila mundi Armeninë në finale dhe siguroi titullin e saj të dytë në këtë turne.
Angazhimi i FSHF-së mbështetet edhe në memorandumin e bashkëpunimit me UNHCR Albania. Përmes tij, palët synojnë të përdorin futbollin për integrimin social të refugjatëve dhe forcimin e lidhjeve me komunitetet ku jetojnë. Krahas ndeshjeve në Coverciano, organizatorët kanë parashikuar aktivitete sociale dhe kulturore për pjesëmarrësit. /FSHF
Raporto një pasaktësi