Portugalia fitoi 3-2 në fushën e Uellsit në ndeshjen e fundit të Grupit A4 të Ligës së Kombeve, duke përmbysur disavantazhin dhe duke e ruajtur epërsinë edhe me dhjetë lojtarë. Carlos Forbs shënoi golin vendimtar në Kardif, përpara se Pedro Neto të përjashtohej me dy kartonë të verdhë.

Kampionët në fuqi e kishin siguruar vendin e parë dhe kualifikimin në çerekfinale para kësaj përballjeje. Suksesi ndaj Uellsit ishte fitorja e tyre e parë pas tërheqjes së Cristiano Ronaldos nga kombëtarja dhe e pesta në këtë fazë të grupeve.

Bruno Fernandes i kaloi portugezët në avantazh në minutën e 11-të. João Neves i mori topin Josh Sheehanit dhe kapiteni i miqve goditi nga kufiri i zonës, duke mposhtur Danny Wardin në paraqitjen e tij të 50-të me Uellsin.

Reagimi i vendasve erdhi dy minuta më pas. Diogo Costa ndali fillimisht një goditje të Harry Wilsonit, por aksioni vazhdoi dhe David Brooks barazoi pas përfshirjes së Rubin Colwillit në ndërtimin e sulmit. Për Brooksin ishte goli i nëntë me përfaqësuesen.

Pesë minuta para pushimit, Uellsi mori epërsinë përmes Sorba Thomasit. Brooks kombinoi me Wilsonin dhe më pas shërbeu për Thomasin, i cili u nis nga gjysma e tij e fushës dhe përfundoi aksionin me gol. Neto u përgjigj shpejt, duke shfrytëzuar një krosim të Trincãos në shtyllën e largët për ta çuar rezultatin në 2-2.

Costa u dallua edhe me një pritje ndaj goditjes me kokë të Ben Cabangos. Më pas, rreth 20 minuta para fundit, zëvendësuesi Forbs përfitoi nga një largim jo i mirë i Cabangos, kaloi nga brenda Ben Daviesit dhe goditi në këndin e poshtëm për 3-2.

Portugalia e mbylli takimin në inferioritet numerik, pasi Neto mori dy kartonë të verdhë brenda rreth dy minutash, të dytin për një ndërhyrje ndaj Brennan Johnsonit. Uellsi nuk arriti të barazonte dhe e përfundoi grupin në vendin e fundit, me një fitore e pesë humbje; atë e pret faza e barazhit mes Ligave A dhe B në mars. /UEFA

Raporto një pasaktësi