David Alaba ka arritur marrëveshje për t’iu bashkuar Udineses si lojtar i lirë, pas përfundimit të kontratës me Real Madridin. Sipas Fabrizio Romanos, mbrojtësi austriak ishte rrugës drejt Italisë dhe pritej të nënshkruante pas kontrolleve mjekësore në Udine.
Palët kanë rënë dakord për të gjitha detajet e kontratës. Për 34-vjeçarin, kjo do të shënonte kalimin në Serie A pas tre muajsh pa klub dhe pas pesë viteve te Real Madridi, ku lëndimet ia kufizuan paraqitjet në sezonet e fundit.
Udinese ndërkohë ka sinjalizuar afrimin e tij në rrjetet sociale me fotografinë e një karrigeje të bardhë. Ky është një aludim për festimin e Alabës në Ligën e Kampionëve të sezonit 2021/22, kur ngriti një karrige pas përmbysjes së Realit ndaj Paris Saint-Germainit.
I njëjti simbol u rikthye pas gjysmëfinales së vitit 2024 kundër Bayernit. Atëherë Rüdiger ia dorëzoi karrigen Alabës, i cili ishte i lënduar, në nderim të festimit të bashkëlojtarit të tij.
Me Austrinë, Alaba mbajti shiritin e kapitenit dhe ishte titullar në katër ndeshje të Botërorit të fundit: tri në grup dhe në duelin me Spanjën, që e eliminoi skuadrën në raundin e 32 ekipeve. Vetëm Arnautovici ka më shumë paraqitje se ai për kombëtaren austriake.
Në karrierën e tij numërohen katër trofe të Ligës së Kampionëve, nga dy me Bayernin dhe Realin. Në Madrid fitoi edhe kampionatin spanjoll, ndërsa në Gjermani grumbulloi dhjetë tituj kampioni dhe 431 paraqitje me klubin bavarez.
Udinese synon ta afrojë mbrojtësin teksa mban vendin e 13-të në Serie A. Në pesë xhirot hapëse ka fituar vetëm një herë, krahas një barazimi dhe tri humbjeve. /GOAL
Raporto një pasaktësi