Elvis Rexhbeçaj është rikthyer në listën e Kosovës për dy ndeshjet e fundit të fazës së grupeve në Ligën e Kombeve, kundër Izraelit dhe Irlandës në nëntor 2026. Mesfushori i Wolfsburgut ishte jashtë përfaqësueses në katër takimet e mëparshme për shkak të një lëndimi.
Rexhbeçaj mungoi gjatë grumbullimeve të shtatorit dhe tetorit, kur Kosova fitoi 1:0 ndaj Irlandës, humbi 3:1 nga Austria dhe barazoi 0:0 me Izraelin e 1:1 me Austrinë. Rikthimi i tij i jep përzgjedhësit Franco Foda një alternativë më shumë në mesfushë për përmbylljen e garës në grup.
Sipas Telegrafit, trajneri i Wolfsburgut, Tobias Strobl, kishte bërë të ditur më 17 shtator se Rexhbeçaj ishte lënduar dhe do të mungonte ndaj Darmstadtit. Një ditë më pas, klubi gjerman kishte njoftuar se shqetësimet në këmbë do ta pengonin t’i bashkohej Kosovës.
Pas rikuperimit, 29-vjeçari ka marrë gradualisht minuta me klubin. Ai ka regjistruar tetë paraqitje dhe 421 minuta në sezon, ndërsa është aktivizuar ndaj Nürnbergut, Heidenheimit, Bochumit, Freiburgut dhe Hertha Berlinit. Angazhimin më të gjatë në këto takime e pati kundër Freiburgut, me 81 minuta në Kupën e Gjermanisë. Ndaj Osnabrückut, më 31 tetor, mbeti në stol.
Kosova hyn në dy ndeshjet përmbyllëse me pesë pikë në Grupin B3, aq sa ka edhe Irlanda. Austria kryeson me tetë pikë, ndërsa Izraeli ka dy. Skuadra e Fodës synon të sigurojë të paktën vendin e dytë.
Përballja e parë është ajo me Izraelin më 14 nëntor në Prishtinë. Tri ditë më vonë, më 17 nëntor, Kosova do ta mbyllë fazën e grupeve në udhëtim ndaj Irlandës, në Dublin.
Krahas rikthimit të Rexhbeçajt, lista e Fodës përfshin edhe tre emra të rinj: Lindrit Kamberin, Bleon Kurtulusin dhe Enis Rexhepin. /TELEGRAFI
Raporto një pasaktësi