Kosova e mbylli me humbje fazën e grupeve të Ligës së Kombeve, duke u mposhtur 3:0 nga Republika e Irlandës më 17 nëntor 2026, në stadiumin “Aviva” të Dublinit. Troy Parrott shënoi dy herë nga penalltia në takimin ku përfaqësuesja e drejtuar nga Franco Foda luajti pjesën më të madhe me dhjetë futbollistë.

Momenti që ndryshoi rrjedhën e ndeshjes erdhi në minutën e 26-të. Kreshnik Hajrizi u përjashtua me karton të kuq kur rezultati ishte ende 0:0, ndërsa ndërhyrja e tij solli edhe penalltinë për vendasit. Parrott e shndërroi në gol në minutën e 28-të.

Kosova nuk pësoi tjetër gol deri në pushim, por Irlanda e dyfishoi epërsinë pak pas nisjes së pjesës së dytë. Në minutën e 50-të, Parrott realizoi sërish nga pika e bardhë, duke e vështirësuar më tej detyrën e mysafirëve.

Vendasit e thelluan rezultatin në minutën e 75-të me golin e Mojlanit, para rreth 50 mijë shikuesve. Irlanda pati mundësi të shënonte edhe golin e katërt, por takimi përfundoi 3:0.

Për Kosovën ishte ndeshja e dytë radhazi që u kushtëzua nga një përjashtim. Edhe në barazimin pa gola ndaj Izraelit në Prishtinë, skuadra e Fodës kishte mbetur me dhjetë lojtarë. Kosova e përfundoi grupin në vendin e tretë dhe mbeti në Ligën B.

Irlanda, ndërkaq, siguroi vendin e dytë në Grupin B3, me dy fitore, dy barazime dhe dy humbje. Ky pozicion i dha një vend në vazon e dytë për shortin e kualifikimeve të Euro 2028 dhe mundësinë për të kërkuar ngjitjen në Ligën A përmes plejofit.

Dy golat ndaj Kosovës e çuan Parrottin në 17 realizime në 43 paraqitje me kombëtaren. Dymbëdhjetë prej tyre i kishte shënuar në nëntë ndeshjet e fundit zyrtare, ndërsa gjashtë në tri paraqitjet e fundit në “Aviva”. Irlanda do të përballet në mars me një skuadër të Ligës A, në dy ndeshje, për të synuar ngjitjen për herë të parë në nivelin më të lartë. /ABC NEWS

Raporto një pasaktësi