Tijjani Reijnders e shpjegoi kalimin nga Manchester City te Al Qadsiah në verën e vitit 2026 me ofertën financiare që, sipas tij, ishte tepër e madhe për t’u refuzuar. Mesfushori holandez u largua nga futbolli evropian pas vetëm një sezoni në Angli.
28-vjeçari pranoi se aspekti financiar kishte qenë arsyeja kryesore e vendimit. Ai tha se i kuptonte komentet e atyre që e lidhnin transferimin me paratë dhe argumentoi se shumica e njerëzve do të pranonin një rritje të tillë të të ardhurave në punën e tyre.
Reijnders theksoi se edhe te City kishte pasur një pagë shumë të mirë, por oferta nga Arabia Saudite ishte dukshëm më e lartë.
Sipas Kohës, holandezi përmendi edhe pakënaqësinë me rolin që i kërkohej të luante te Manchester City. Ai e lidhi vendimin me sigurimin e së ardhmes së brezave të ardhshëm të familjes së tij dhe la të hapur mundësinë e rikthimit në Evropë pas tri ose katër vjetësh në Arabinë Saudite.
City e konfirmoi largimin e tij në një transferim të përhershëm, të kushtëzuar nga marrja e lejes ndërkombëtare. Sipas ekspertit të merkatos Fabrizio Romano, të cituar nga Goal, shuma e transferimit ishte 61 milionë euro.
Reijnders kishte mbërritur nga Milani në qershor të vitit 2025. Në 50 paraqitje me Manchester Cityn në të gjitha garat shënoi shtatë gola, përfshirë një në debutimin e tij në Premier League, në fitoren 4:0 në fushën e Wolverhamptonit.
Gjatë sezonit 2025/26 ai kontribuoi në fitimin e FA Cup dhe Kupës së Ligës. Mesfushori ishte gjithashtu pjesë e përfaqësueses së Holandës në Kupën e Botës 2026. /MANCHESTER CITY
Raporto një pasaktësi