Thomas Tuchel ka bërë të qartë se synon të qëndrojë në krye të Anglisë deri në Euro 2028, edhe nëse merr oferta nga klube të mëdha. Para ndeshjes së Ligës së Kombeve kundër Kroacisë, trajneri konfirmoi se kontrata e tij nuk përmban klauzolë që do t’i mundësonte largimin kundrejt një pagese.
Tuchel e lidhi vendimin me objektivat që ende dëshiron t’i përmbushë me përfaqësuesen angleze. Ai mori drejtimin pas Gareth Southgate në vitin 2025 dhe në shkurt e zgjati kontratën deri në Evropianin e vitit 2028, ku Anglia do të jetë një nga vendet bashkorganizuese.
Në turneun e tij të parë të madh me Anglinë, Kampionatin Botëror, skuadra arriti në gjysmëfinale, ku u eliminua nga Argjentina. Para ardhjes së tij, anglezët kishin humbur dy finale radhazi të Kampionatit Evropian nën drejtimin e Southgate.
Tuchel theksoi rëndësinë e besimit që merr nga drejtuesit e federatës, si dhe lidhjen me lojtarët e stafin. Ai e paraqiti fitimin e Ligës së Kombeve dhe përpjekjen për të triumfuar në Evropian si objektivat që e motivojnë në këtë detyrë.
Megjithatë, Tuchel nuk e ka mbyllur kapitullin e futbollit të klubeve. Ish-trajneri i Chelseat, Bayern Munichut dhe Paris Saint-Germainit pranoi se i mungojnë ritmi i një sezoni me rreth 50 ndeshje dhe puna e përditshme me skuadrën. Ai synon të rikthehet te klubet pas përfundimit të angazhimit me Anglinë, por nuk përjashtoi as qëndrimin përtej Euro 2028.
Në planin sportiv, Anglia ka fituar tri nga katër ndeshjet e Ligës së Kombeve pas Botërorit, përfshirë fitoren 7:0 në Kroaci. Ajo ndodhet në vendin e dytë të grupit, pas Spanjës, përpara dy takimeve të fundit.
Anglezët presin Kroacinë në Wembley të enjten dhe më pas përballen me Spanjën në Madrid të dielën. Tuchel ka paralajmëruar një formacion të fortë ndaj kroatëve, ndërsa skuadrës i duhet një pikë nga këto dy ndeshje për të siguruar çerekfinalet. /BBC
Raporto një pasaktësi