Manchester Unitedi ka nisur të identifikojë kandidatë të mundshëm për ta zëvendësuar Michael Carrickun, por trajneri pritet ta drejtojë skuadrën kundër Bournemouthit të dielën në Premier League. Sipas BBC Sport, Carrick po vazhdon punën normalisht pas humbjes 4:1 nga Como në Ligën e Kampionëve dhe nuk është njoftuar për ndonjë ndryshim të menjëhershëm.
Unai Emery dhe trajneri i Brightonit, Fabian Hürzeler, vlerësohen nga drejtuesit e Unitedit, megjithëse largimi i tyre nga klubet përkatëse konsiderohet i vështirë. Në të njëjtin raport, Eddie Howe, Antonio Conte dhe Julian Nagelsmann, të cilët janë pa skuadër, përmenden si të interesuar për postin në Old Trafford.
Presioni mbi Carrickun u shtua pas disfatës në Itali, ku Unitedi regjistroi ndeshjen e shtatë radhazi pa fitore në të gjitha garat. Skuadra ka fituar vetëm dy nga 11 takimet e këtij sezoni dhe ka arritur ta mbajë portën të paprekur vetëm një herë.
Como e mori epërsinë në minutën e dytë me Nico Pazin, i cili shfrytëzoi hapësirën e lënë nga Harry Maguire. Pas pushimit, në minutën e 49-të, Paz shërbeu për Tasos Douvikasin, që u shkëput nga Matthijs de Ligt dhe dyfishoi rezultatin.
Paz shënoi sërish në minutën e 57-të pasi ia mori topin Carlos Balebas, ndërsa Jacobo Ramon realizoi me kokë golin e katërt në të 76-tën. Joshua Zirkzee shënoi golin e vetëm të Unitedit në minutën e parë shtesë. Pas tri ndeshjeve në fazën e ligës, klubi anglez ka tri pikë.
Pas takimit, kapiteni Bruno Fernandes vuri në pikëpyetje taktikat e Carrickut. Trajneri, nga ana e tij, e cilësoi paraqitjen të papranueshme dhe shprehu pakënaqësi me atë që skuadra dha në fushë.
Brenda drejtimit të klubit ka megjithatë edhe qëndrime në favor të dhënies së më shumë kohe Carrickut. Disa drejtues vlerësojnë se ndryshimet e shpeshta të trajnerëve nuk e kanë ndalur rënien dhe se lojtarët mbajnë gjithashtu përgjegjësi. Carrick u emërua përfundimisht në maj, pasi kishte arritur 12 fitore në 17 ndeshje si trajner i përkohshëm dhe kishte siguruar kthimin në Ligën e Kampionëve. /BBC
Raporto një pasaktësi
