Juventusi po shqyrton mundësinë e afrimit të një sulmuesi në afatin kalimtar të janarit, me Benjamin Seskon e Manchester Unitedit mes pesë emrave në listë. Sipas Calciomercatos, klubi italian kërkon më shumë alternativa në sulm pas vështirësive për të shënuar rregullisht këtë sezon.
Rendimenti i Randal Kolo Muani dhe Nick Woltemade është një nga arsyet e këtij interesimi. Dy sulmuesit kanë realizuar së bashku vetëm një gol në dhjetë xhirot e para të Serie A, të shënuar nga francezi. Në Ligën e Evropës, Woltemade ka shënuar tri herë, ndërsa Kolo Muani dy.
Luciano Spalletti ka ngurruar t’i përdorë njëkohësisht dy sulmuesit, sepse do të mbetej me më pak mundësi për ndryshime nga stoli. Përmirësimi i rendimentit të tyre deri në janar mund të ndikojë në vendimin e drejtuesve për të ndërhyrë në treg.
Përveç Seskos, në shqyrtim janë Folarin Balogun i Monacos dhe Brian Brobbey i Sunderlandit. Sulmuesi amerikan ka kontratë deri në qershor të vitit 2028 dhe ka shënuar një gol në pesë paraqitje në Ligue 1 këtë sezon.
Brobbey ka realizuar tre gola në tetë ndeshje për Sunderlandin dhe së fundmi e ka zgjatur kontratën deri në vitin 2031. Sesko, ndërkohë, është jashtë fushave për shkak të një lëndimi.
Dy alternativat e tjera të përmendura janë Younes Ebnoutalib i Eintracht Frankfurtit dhe Antonio Raimondo i Frosinones. Ebnoutalib ka shënuar tetë gola në dhjetë paraqitje në të gjitha garat këtë sezon.
Planet lidhen edhe me hapësirën financiare të klubit. Sipas vlerësimit të GOAL, rritja e kapitalit me 250 milionë euro mund t’i sigurojë Juventusit rreth 100 milionë euro për përforcime gjatë janarit dhe verës së ardhshme. /GOAL
Raporto një pasaktësi
