Argjentina humbi 2-1 ndaj Uruguait të premten në La Bombonera, në ndeshjen e saj të parë pas tërheqjes së Lionel Messit. Miqësorja u vendos nga dy gola të mysafirëve pas pushimit, ndërsa reagimi i vendasve solli vetëm golin e Julian Alvarezit.
Takimi ishte edhe i pari për Lionel Scalonin pas zgjatjes së kontratës deri në vitin 2030. Përpara tribunave me shumë vende të zbrazëta, Argjentina mbajti më tepër topin, por hasi vështirësi për të çarë mbrojtjen e ngjeshur të skuadrës së Diego Forlanit.
Me qendrën të mbuluar nga uruguaianët, vendasit kërkuan hapësira në krahë, ku u aktivizuan edhe mbrojtësit Gonzalo Montiel e Facundo Medina. Ky i fundit provoi nga larg, por pa e vënë në vështirësi portierin Cristopher Fiermarin.
Fiermarin ishte vendimtar që pjesa e parë të mbyllej pa gola. Ai fitoi përballjet me Alvarezin dhe Nico Pazin, ndërsa në aksionin e nisur nga një pasim i Alexis Mac Allisterit, mbrojtja bllokoi edhe tentativën e Thiago Almadës pas pritjes së portierit.
Pas pushimit, Argjentina luajti me një sulmues më shumë, Matias Soulen, në vend të mesfushorit Exequiel Palacios. Por ishte mbrojtja vendase që pësoi: një top nga goditja e lirë përfundoi në autogol, kur largimi i tentuar nga Lisandro Martinez u përplas te Leonardo Balerdi.
Edhe goli tjetër uruguaian erdhi nga një goditje standarde. Maximiliano Araujo shfrytëzoi këndoren e Giorgian de Arrascaetës për të çuar shifrat në 2-0. Këndorja ishte fituar pas një pritjeje të Geronimo Rullit ndaj Darwin Nunezit.
Përgjigjja argjentinase erdhi përmes zëvendësuesit Gianluca Prestianni. I shërbyer nga Enzo Fernandez, ai depërtoi nga krahu dhe gjeti Alvarezin, që përfundoi aksionin me gol. Aktivizimi i Prestiannit i dha vendasve një rrugë tjetër për të sulmuar mbrojtjen kundërshtare.
Përpjekjet e fundit nuk sollën barazimin: mbrojtja bllokoi një goditje të Fernandezit dhe Alvarez pati një rast në kohën shtesë. Me këtë sukses, Forlani arriti fitoren e tretë si trajner i Uruguait. /GOAL
Raporto një pasaktësi