Boca Juniors fitoi 1-0 ndaj River Plate në La Bombonera të Buenos Airesit, falë golit me kokë të Lautaro Di Lollos në pjesën e parë. River e përfundoi Superclásicon me nëntë lojtarë, në një takim të shoqëruar me ndërhyrje të forta, përplasje dhe dy kartonë të kuq për mysafirët.
Ekuilibri numerik u prish që në fillim. Lucas Martínez Quarta ndali Miguel Merentielin, i cili po shkonte drejt portës, dhe arbitri e përjashtoi me karton të kuq pas rishikimit të aksionit në VAR. River u detyrua të riorganizonte menjëherë mbrojtjen, duke aktivizuar Lautaro Riveron.
Megjithatë, epërsia numerike nuk u kthye menjëherë në raste të shumta për Bocan. Një goditje dënimi e Leandro Paredesit, e pritur nga Santiago Beltrán, ishte ndër kërcënimet e para, përpara se vendasit ta gjenin golin nga një goditje këndi.
Sebastián Villa dërgoi topin në zonë dhe Di Lollo shënoi me kokë, duke i shpëtuar mbulimit të Riveros. Pas avantazhit, Boca gjeti më shumë hapësira për kundërsulme. Në një prej tyre, Rivero ndërhyri për të larguar një pasim të rrezikshëm të Villas para portës.
Fundi i pjesës së parë solli edhe një përplasje mes Paredesit dhe Marcos Acuñas. Të dy futbollistët u ndëshkuan me kartonë të verdhë, ndërsa ndërprerjet dhe debatet shoqëruan vazhdimisht lojën.
Pas pushimit, Boca krijoi mundësi të tjera për ta zgjeruar epërsinë, por Ascacíbar dhe Villa nuk i shfrytëzuan rastet e tyre. River kërcënoi kryesisht nga goditjet standarde, pa arritur të barazonte.
Mysafirët mbetën më pas me nëntë lojtarë, kur Gonzalo Montiel mori karton të kuq të drejtpërdrejtë për një ndërhyrje ndaj Lautaro Blancos. Gjatë largimit të tij u hodhën sende drejt tij dhe mbrojtësi u shoqërua nga policia drejt dhomave të zhveshjes.
Boca e ruajti avantazhin deri në fund dhe regjistroi fitoren e tretë radhazi ndaj River Plate në Superclásico. /GOAL
Raporto një pasaktësi